Helgi Ingólfsson er rithöfundur og framhaldsskólakennari. Eftir hann liggur tugur skáldsagna af ýmsum toga, smásagnasafn, ljóðabók og margt annað hráviði af ritvellinum. Meðal skáldsagna eru Letrað í vindinn – Samsærið sem hlaut Bókmenntaverðlaun Tómasar Guðmundssonar 1994, Þegar kóngur kom sem hlaut Blóðdropann, hin íslensku glæpasagnaverðlaun 2010, og Andsælis á auðnuhjólinu, en eftir þeirri bók var gerð kvikmyndin Jóhannes, með Ladda í aðalhlutverki. Hér er að finna vísur af ýmsu tagi, einkum gamanmál þar sem skopast er með dægurþras líðandi stundar og stjórnmálamenn teknir á beinið, stundum nokkuð stórkarlalega, en inn á milli eru einnig alvarlegri ljóð og stökur. Form ljóðanna eru af ýmsum toga kvæði, drápur, limrur, ferskeytlur, slitrur, sléttubönd en undantekningarlítið er ort í samræmi við hefðbundna bragfræði, með ljóðstöfum og rími.